MALAYSIA MIZOTEN MCF DAY VAWI 6-NA TLUANG TAKIN HMANG

By: Lalchhanhima, Malaysia
Malaysia Mizoten Mizo Christian Fellowship Day Vawi 6-na (29,31 August 2010) chu hlim tak leh kham lo takin in kan hmang tluang.Kumin MCF Day hi Mizo 500 rual velin kan hmang a, Yangon atangin khualian Rev.Chuangsangvunga (Asst. Secretary of Yangon Mizo Society) leh a thiannu Pi Lalduhawmi ten min rawn tawiawm a, kan thla a muang hle.

Ni 29 August 2010, Chawlhni-ah KLBC , Kuala Lumpur-ah zing lam dar 9 atang 11:15 thleng inkhawmhona kan nei a, programme tluang takin kan hmang. MCF President Pu Hualsailova chibai bukna-in mi a chawk phur a. Kan khuallian Rev.Chuangsangvunga leh kan rawngbawltu Rev.Lalthuamluaia ten Mizona-ah lungrual zela Mizona tivul zel tur leh Mizo hnam hmasawn zel dan tur lam hawiin thu min fah. MCF chanchin sawitu Pu Hmingliana avangin Malaysia Mizote insuihkhawm pawl lo huaihawttu kal hmasate kan rilru-ah an lo lang uaih uaih. Mimal zai ngaihthlak a nuam . MCF zaipawl an thiam. Zo Rimawi Group-in “Kawl A Eng Tan Ta” hla thiam tak maiin an sa a, mipui lawm a hlawh hle.Zo Rimawi Group hi music lam leh zai lamah min hruaitu ber a ni.

Ni 31 August 2010, Thawhlehni-ah Inbi khelmual, Kuala Lumpur-ah zing lam dar 9 atang tlai lam dar 6 thleng programme kan hmang. Mizo hnam lam Sarlamkai leh Zawlkhawsir Lam kan lam.Infiam inelna chi hrang hrang – Hrui inpawh, Lungden , Fei khawh ,Intlan siak, Inzuan siak, Baloon inthut puah siak, Foot ball khelh hmangin intihhlim inpawlhona kan nei.Football-ah KL MCF-in pakhatna, Pudu MMC (Malaysia Mizo Community)-in pahnihna an la.

Malaysia Mizote hi lungrual tak leh chak taka kan kal zel theih nan, mi ramah pawh Mizona chhawm nung zel theitu kan nih zel theih nan hnam ni ve tura min lo dintu kan Pathian hnenah min dilsak turin khawvel hmun hrang hranga awm Mizote hnenah kan ngei e.