IQ atangin EQ lamah

By: Josephsaia
Mithiamten IQ (Intelligent Quotient) tia an sawi fo thin hi kan hre hle awm e. Mizo tawnga a awmzia chu thluak hnathawh dan atanga thil kan hriat chak leh chak loh finfiahna ti ila a sual tam awm lo ve. Thluak hnathawh dan hriatchian tumin scientist mithiamte chuan vawi duai lo research an lo bei tawh a. Psychologist Jean Piaget-a pawhin thluak hnathawh dan hriatchian tumim naupang tam tak a lo finfiah tawh thin a, mahse thlauk hnathawh dan ziahna lehkhabu hmasa ber erawh kum 1905 khan France mi, psychologist Alfred Binet-an a lo chhuah daih tawh a ni.

A hnuah chuan scientist mithiamten thluak hnatawh dan chi hrang hrang an hriattheih nan mimal kum zira then a tul thu an rawn hmuchhuak ta a, chutianga mimal kum zira thluak hnathawh dan enchhinna chu America Stanford University-a psychologist professor Lewis Terman-an a rawn buatsaih ta a, chu enchhinna chu (Inteligent Quotient) IQ tiin hming a vuah ta a.

IQ enchhinna hian a huam zau hle a, science leh sociology zirna lam thlengin a huap tel vek a. Kum zabi 19 chho vel phei kha chuan he IQ enchhinna hi a rawn lar chho em em mai a, khawvel hmuntinah enchhinna beihpui thlak a ni. Khawvel IQ enchhinaa mark hmu sang ber chu Evolution Theory hmuchhuaktu Charle Darwin-a unau pa Francis Galton-a kha a ni. Francis Galton-a chuan, “IQ hi mihringa thil hlu ber a ni a, miin finna a neih phawt chuan hruaitu nih a phu a, ram leh hnam tan hlawkna ropui tak a ni bawk,” a lo ti hial a ni.
Hetianga thiamna leh finna endik nana zawhna siam hi Khawvel Indopui I lai khan America chuan a ngai pawimawh hle a. Sipaia luh tur reng reng chuan IQ Test a nei hmasa ngei ngei tur a ni tih thu a chhuah a, sipai a lak tumah pawh sipai maktadaui 1.7 lai chu IQ a exam reng a ni. Hemi tum hi Khawvela IQ Test beihpuithlakna hmasa ber a tling a, amaherawhchu kum 1971 khan US Supreme Court chuan IQ Test hi tul lova a hriat avangin a khapbet ta a, engemaw bik atana ruahman a nih loh chuan IQ Test hi an hmang tawh meuh lo a ni. IQ Test an chhinchhiah danin mi pangaite hian IQ Score 90 atangin 110 thleng an nei thei a, Khawvela IQ Score sang bera an ngaih chu MarilynVos Savant-i a ni. Savant-i hian IQ Score 288 meuh a hmu thei a, mahse Savant-i hian hna sang tak a chelh pha chuang lova, Parade Magazine-a Interview siamtu a ni phak tawk lek a ni.

EQ (Emotional Quotient) erawh chu rilru lam endikna ni tho mah se thil kan hriat chak leh chak loh lam ni lovin, kan rilru kan control theih leh theih loh lam endikna a ni ve thung. Entirnan, ‘Dawhkanah thil engemaw ei tur khuh la, naupangho hnenah, “Ka rawn kal leh hma chu tumahin he thil hi lo hawng suh u” ti ta la, rilru control thei lo naupang chuan a lo hawng ang a, a lo en mai ang. Chu naupang chu IQ nei tha viau a ni thei, mahse a EQ dinhmun lamah chuan hniam tak a ni leh thei si a ni. Heng dinhmun atang hian IQ nge pawimawh zawk a, EQ zawk tih hi mithiamten an chhut nasa hle a ni.

Kum 40 vel kal ta khan scientist mithiamte chuan thluak leh tha zungzam hnathawh dan (Nervous System) hi chiang taka hriatna an la nei meuh lova. Mahse tunlai scientist-te erawh chuan research an beihnaah khawlthlauk (Electronic Brain)-te an vuah a, chu khawl chuan a duh ang anga hna a thawhtheih nan (Goal-striving Mechanism) bungruate pawh vuahin Nervous System inrelbawl dante chu nasa takin an chhui tawh a ni.
Mitin hian taksa pianhmang (Physique), rilru put dan/sukthlek dan (attitude), nihna (qualification) te kan nei theuh va, hengahte hian kan ngaihtuahna hlimthal dik tak (Self image) a awm theuh bawk a, Chubakah keimahni chhungrilah hian rilru hmunkhat hnathawh dan hrang tlat si a awm thei bawk a, chu chu (self) kan tih hi a ni. Kan self atanga chhuak, kan thinlung hian kan chetzia leh awm dan tur te, kan tui zawng leh tui loh zawngte pawh a siam vek niin mithiamte chuan an sawi a.

Khawvela thilnung tinrengte pawh hian anmahnia khawsak inrelbawlthiehna hmarua an nei theuh va, mahse mihring chuan ngaihtuaha hriatna (Creative Imagination) a nei bik tlat a, chu a hamthatna bik chu hrechiang a, tihmasawn tura a rilru lam hnathawh dante a chhut ngun a tul hle a ni. Mithiamte chhut dan chuan mihring thluak pakhatah hian Nervous cell billion 50 leh vervous zawmkhawmtu celHwejidoidfkjoiffjrefpjoldkfepw=ijdodpfkel billion mataduai khat vel a awm a, secone khat chung hian cell billion mataduai 10 in hna an thawk a ni. Chutiang khawp chuan Pathian hian mihringte hi min siam danglam bik a, heti zozai malsawmna kan dawn hi a hman dan kan thiam a, kan IQ leh EQ te hmanga khawvel tihhmasawn zel hi kan mawhphurna lian tak a nih avangin kan dinhmun tawn zelah hian tan ila ang u.